Северна Кореја соопшти дека нејзината војска спровела заедничка вежба на артилериските и ракетните единици, само еден ден по завршувањето на маневрите на САД, Јужна Кореја и Јапонија.
Државната агенција КЦНА информираше дека вежбата се одржала во саботата и во неа учествувале избрани единици од пет артилериски и ракетни формации на Корејската народна армија. За време на маневрите биле користени „нови борбени системи“, меѓу кои разни видови напаѓачки дронови, тактички крстосувачки ракети, повеќецевни ракетни системи од голем калибар со термобарична муниција, како и тактички балистички ракети.
Вежбата ја надгледувал маршалот Пак Јонг Чон, потпретседател на Централната воена комисија на владејачката Работничка партија, заедно со директорот на Управата за артилерија, генерал-мајор Ју Чанг Сон.
Според КЦНА, сите системи што се користеле за време на вежбата ги погодиле предвидените цели со „100 проценти точност“, со што била демонстрирана способноста за извршување истовремени концентрирани напади.
Генерал-мајор Ју Чанг Сон изјави:
„Ваквите вежби имаат цел да ја зајакнат способноста за стратешки контранапад и побрз одговор на единиците во итни ситуации.“
Од друга страна, американската војска во петокот соопшти дека ги следи неколкуте севернокорејски лансирања ракети, но процени дека тие не претставуваат непосредна закана за американскиот воен персонал, територијата на САД или сојузниците во регионот.
Лансирањата уследија веднаш по завршувањето на петдневната трилатерална поморска вежба „Freedom Edge“ помеѓу Јужна Кореја, САД и Јапонија, која се одржа во меѓународни води јужно од јужнокорејскиот остров Чеџу.