Градоначалникот на општина Гази Баба, Бобан Стефковски, информира дека е склучен договорот за изработка на основен проект за зафаќање на вода од Раштанска река, со што започнува решавањето на децениското барање на жителите од ова населено место.
Од локалната самоуправа посочуваат дека станува збор за долгогодишен проблем и потреба на населението, за кој изминатите години постоел голем интерес и очекување.
Со изработката на основниот проект се поставуваат темелите за реализација на овој капитален зафат, кој во иднина треба да овозможи подобри услови и поквалитетна инфраструктура за жителите.
Како што појаснува градоначалникот Стефковски, финансиските средства за реализација на овој проект се веќе обезбедени од страна на Министерството за локална самоуправа.
Според него, ова претставува уште еден доказ за успешната и партнерска соработка помеѓу централната и локалната власт која се спроведува во директен интерес на граѓаните.
Од општина Гази Баба додаваат дека продолжуваат посветено да работат на реализација на проекти кои директно ги решаваат потребите на граѓаните и придонесуваат за рамномерен развој на сите населени места.
Населбата Раштак, како што се наведува, заслужува внимание, инвестиции и конкретни решенија, а овој проект е придвижен токму во таа насока.