Со одржување на првата јавна расправа во Музејот на македонската борба во Скопје, официјално започна процесот за креирање на новата Национална стратегија за развој на туризмот за периодот од 2027 до 2032 година.
Министерот за култура и туризам, Зоран Љутков, посочи дека овој стратешки документ е од клучно значење за градење на модерен, одржлив и конкурентен туристички сектор во државата.
Според ресорниот министер, новиот стратешки пристап е неопходен за соочување со глобалните промени, при што туризмот игра витална улога во економскиот развој, отворањето работни места, привлекувањето странски инвестиции и меѓународната промоција.
„Македонија располага со исклучителни природни и културни богатства. Наша задача е тој потенцијал да го претвориме во силна конкурентска предност и препознатлив бренд,“ порача Љутков.
Новата стратегија ќе биде фокусирана на неколку клучни столбови, меѓу кои се рамномерниот регионален развој, дигитализацијата на промоцијата, заштитата на културното наследство, подигнувањето на квалитетот на услугите и поефикасен дестинациски менаџмент.
На првата дебата учествуваа широк спектар на засегнати страни, вклучувајќи хотелиери, туристички агенции, водичи, претставници на локалните самоуправи, стопански комори и експерти од академската заедница.
Од Министерството за култура и туризам најавија дека во претстојниот период ќе организираат дополнителни тематски работилници и консултации со цел да се обезбеди широк консензус и квалитетни содржини.