Вицепремиерот Александар Николоски вели дека се работи на изградба на пругата кон Бугарија, а дека за тунелот веќе се добиени позитивни сигнали од Софија.
„Проблемот со Бугарија во однос на пругата е решен. Тоа беше чисто технички проблем. Добиваме позитивни сигнали за тунелот, штом колегите од Бугарија се подготвени, ќе работиме и на граничниот тунел“, информира вицепремиерот Николоски во поткастот „Риштази“.
Тој појаснува дека во ноември е потпишан меѓудржавен договор со тогашниот вицепремиер и министер за транспорт Гроздан Караџов, а по формирањето на новата влада во Бугарија пристигнуваат сигнали за продолжување на соработката.
Николоски наведува дека од македонска страна се работи на сите делници од железничкото поврзување: од Скопје до Куманово, потоа од Куманово до Белјаковце, каде делницата беше пуштена во јануари 2025 година, како и на делницата од Белјаковце до Крива Паланка.
За третата делница, од Крива Паланка до границата со Бугарија, тој информира дека веќе е објавен тендер за надзор, а во наредните недели се очекува тендер за избор на изведувач, со поддршка од Европската инвестициска банка.
„И штом колегите од Бугарија се подготвени, ќе работиме и на граничниот тунел. Таму се сложивме да градиме по наш проект и да имаме некаде 2031 или 2032 година поврзување Скопје – Софија“, додава Николоски.