Фирмата „Дигитал оне“, која има само двајца вработени и е формирана пред една година, добила државни тендери во вредност од скоро 9 милиони евра во период од само шест месеци, обвини денеска генералниот секретар на СДСМ, Александар Саша Димитријевиќ.
Според опозицијата, компанијата е регистрирана за трговија со информатичка опрема, но нема историја ниту портфолио. Од мај до ноември 2025 година, таа склучила шест договори, од кои четири се директно со Генералниот секретаријат на Владата.
Најспорен за СДСМ е последниот договор – рамковна спогодба за софтверски лиценци за виртуелна платформа вредна 8 милиони евра. Димитријевиќ јавно праша дали сопственикот Кристијан Арсовски е во роднинска врска со поранешниот портпарол на ВМРО-ДПМНЕ, Димса Арсовски.
„Фирма без историја, без искуство, без портфолио – регистрирана за трговија со информатичка и комуникациска опрема добива речиси 9 милиони евра за само 6 месеци. Или по 1,5 милиони евра месечно. Основана е од извесен Кристијан Арсовски и има само двајца вработени. Да, добро слушнавте, 2 вработени, со речиси 9 милиони евра добиени пари од граѓаните. (…) Ако ова не е класична шема за испумпување на парите на граѓаните преку фирми блиски до власта тогаш што е?“, праша Димитријевиќ.