Од СДСМ обвинуваат дека работниците во Македонија сè потешко ги покриваат основните животни трошоци, додека минималната плата не е доволна ниту за основните потреби на едно четиричлено семејство.
Според податоците што ги посочува партијата, само за храна и пијалаци во октомври биле потребни 26.170 денари, што е речиси 2.000 денари повеќе во споредба со јануари. Потрошувачката кошничка надминува 70.000 денари, а со трошоците за станбено живеење износот надминува 90.000 денари.
Од СДСМ наведуваат дека од вкупно 540.000 вработени, околу 180.000 земаат месечна плата пониска од 31.200 денари. Тоа, според партијата, значи дека приближно една третина од работниците се соочуваат со приходи под прагот на сиромаштијата.
„Овие луѓе одат на работа, работат, вложуваат труд и немаат доволно за достоинствен живот – буквално живеат во сиромаштија“, се наведува во партиското соопштение.
Од СДСМ ја критикуваат и најавената можност за ангажирање странски работници, оценувајќи дека наместо да се работи на зголемување на домашните плати и подобрување на животниот стандард, се отвора простор за увоз на работна сила.
Партијата ги посочува изјавите за можен ангажман на 50.000 економски работници, бројка што му ја припишува на Николовски, како и изјавата на премиерот Христијан Мицкоски за повеќе од 100.000 работници.
Од СДСМ директно ја обвинуваат актуелната власт дека не презема доволно мерки за подобрување на стандардот на работниците и порачуваат дека ниските плати и растечките трошоци за живот остануваат сериозен проблем за голем број семејства во земјава.