Од СДСМ велат дека по скандалот со величењето на воениот злосторник Ратко Младиќ нема ниту оставки ниту разрешувања на Иван Стоилковиќ и Далибор Китановиќ.
„Мицкоски ги спаси. Не требало да се бара кривична одговорност, вели Мицкоски, доволно било што го избришал својот став. Секоја изјава на Мицкоски е скандал сама по себе“, велат од СДСМ.
Оттаму обвинуваат дека „законот не важи за министрите и директорите на Мицкоски, ниту за самиот Мицкоски“, додавајќи дека тој одлучува дали некој треба кривично да се гони.
„Бришењето на објава од профилот на социјалните мрежи не значи бришење на став. Бришењето на објавата не може да ја избрише историјата и не може да ја избрише пресудата за воени злосторства на осудениот Младиќ“, велат од СДСМ.
Од партијата додаваат дека без оставки и разрешувања на Стоилковиќ и Китановиќ „значи дека тие останале на истиот став дека Младиќ е нивен генерал“.
„Со тоа што Мицкоски ги штити, потврди дека Младиќ е и негов генерал. Знаевме дека Младиќ е генерал на Вучиќ. Сега знаеме дека е и на Мицкоски“, стои во реакцијата.
СДСМ го обвинува и директорот на Управата за развој и унапредување на образованието на јазиците на заедниците, Мирослав Тричковиќ, за објавување, како што велат, „гнасни текстови полни со тешки навреди и говор на омраза“ кон СДСМ и претседателот Венко Филипче.
„Кампањата ‘Талог’, полна со навреди за граѓаните, поделби и сеење омраза, е во полн ек. Тоа е екипата на Стоилковиќ. Тоа е екипата на Мицкоски, а сите заедно се екипата на Вучиќ“, велат од СДСМ.