Санела Давиткова, учителка од Кочани, која беше повредена во пожарот во дискотеката „Пулс“ и се лекуваше во Белград, ја отвори душата за српскиот „Курир.рс“, раскажувајќи за ужасот од кобната ноќ кога загинаа 63 лица.
Санела сведочи дека таа и нејзиното друштво биле веднаш пред сцената, директно под пиротехниката, и на почетокот не го сфатиле пламенот сериозно.
„На почетокот дури и не го сфативме пламенот сериозно, мислевме дека е дел од настапот. Сè додека пејачот не извика: ‘Излезете сите!’“, раскажува таа.
Тројца од друштвото, вклучувајќи ја и неа, се заглавиле на самата врата.
„Јас бев само на чекор од излезот. Кога го почувствував жешкиот воздух, инстинктивно ги ставив рацете преку лицето“, вели Санела, објаснувајќи дека благодарение на таа инстинктивна реакција, лицето ѝ било зачувано, но рацете ѝ останале со траги од пламенот.
Потресниот момент на препознавање:
„Не се сеќавам на ништо друго, мислам дека се онесвестив за момент. Не можев да дишам. Кога се разбудив – бев заглавена. Луѓето натрупани еден врз друг. Во толпата врескајќи, првото нешто што го видов на вратата беше моето момче. Го повикав, но тој не ме препозна, сите бевме поцрнети. На крајот ме слушна. Не знам како успеа да ме извлече.“
Момчето ја оставило пред дискотеката и се вратило да ги извлече пријателите. Санела со тага се сеќава на својот пријател Столе, кого го сакала многу:
„Столе, едниот од нив, кого многу го сакав, беше пред амбулантното возило што ме однесе. Беше многу храбар. Постојано ми велеше дека сè ќе биде во ред. И на крајот не издржа, почина во Белград“, завршува Санела за „Курир.рс“.