Европски министри за финансии и други функционери изразија незадоволство поради учеството на Русија на финансискиот состанок на Г20 во САД, оценувајќи дека не може да има нормализација на односите со Москва додека трае војната во Украина.
Рускиот министер за финансии Антон Силуанов присуствуваше на состанокот во Ешвил, Северна Каролина, заедно со претставници на руската централна банка. На маргините од состанокот тој разговарал со американскиот секретар за финансии Скот Бесант за финансиската соработка меѓу Русија и САД и за интеракцијата во рамките на Г20.
Германскиот министер за финансии Ларс Клингбеил оцени дека сигналот испратен со пречекот на рускиот министер е загрижувачки и порача дека Европа подготвува нов пакет санкции против Русија.
Европските министри и централни банкари се спротивставиле и на учеството на Силуанов на заедничката фотографија на учесниците, по што било одлучено таа да биде направена без рускиот министер.
Клингбеил рече дека самото враќање на Силуанов на состанок на Г20 по неколку претходни отсуства може да се толкува како обид за нормализација на односите со Москва и нагласи дека европските земји ќе се спротивстават на таквиот пристап.
САД, како домаќин на состанокот, го составиле списокот на поканети. На состанокот не биле поканети Јужна Африка, која минатата година беше домаќин на Г20, ниту Шпанија.