Мировните преговори со цел ставање крај на војната во Украина во моментов се во застој поради недостаток на напредок, потврди американскиот државен секретар Марко Рубио. Тој нагласи дека Вашингтон привремено се повлекува од актуелните дипломатски напори, но останува отворен за повторно посредување доколку се променат условите на теренот.
Говорејќи пред новинарите на маргините на самитот на министри за надворешни работи на НАТО во Шведска, Рубио појасни дека САД се вклучиле во директните дипломатски напори бидејќи и Москва и Киев го гледале Вашингтон како клучен посредник. Сепак, тој изрази фрустрација од досегашниот тек на состаноците кои не донеле конкретни резултати.
„Се вклучивме бидејќи ни беше качено дека сме единствените кои можат да го направат тоа. Бевме единствените со кои и Русите и Украинците би разговарале. Затоа се вклучивме. За жал, тие не беа плодоносни. Подготвени сме да продолжиме да ја играме таа улога“, изјави Рубио.
Американскиот шеф на дипломатијата децидно ги демантираше гласините дека Белата куќа врши притисок врз Киев за прифаќање на одредени отстапки.
„Приказните кои се шират дека ги принудувавме Украинците да заземат одреден став не се точни“, истакна тој, додавајќи дека поддршката на САД за Украина останува непроменета.
Според него, администрацијата на претседателот Доналд Трамп нема намера да троши време на формални средби без суштина, бидејќи крајниот излез од конфликтот мора да биде дипломатски, а не воен.
„Нема да заврши со воена победа на едната или на другата страна, барем не од традиционална гледна точка на дефиницијата за воени победи. Затоа, тие ќе мора да водат преговори, а ако ние можеме да одиграме улога во тоа, претседателот е многу заинтересиран. Подготвени сме да одиграме каква било конструктивна улога… Исто така, не сме заинтересирани да влегуваме во бесконечен циклус на состаноци кои не водат никаде“, заклучи Рубио.