Потрага по пет лица е во тек во центарот на Атина откако разорна експлозија на гас уништи зграда на улицата Лисикратос во познатата туристичка населба Плака.
Во акцијата за спасување учествуваат специјални единици со дронови, термални камери и кучиња трагачи. Во моментот на експлозијата, на вториот кат од објектот престојувал постар пар, додека на првиот кат во апартман за изнајмување биле сместени три лица, по кои сè уште се трага.
Градоначалникот Харис Дукас ја оцени ситуацијата како мошне тешка, нагласувајќи дека станува збор за екстремно уништување.
„Ова се критични моменти, потребна е многу добра координација, ние сме тука и помагаме со сите наши сили,“ истакна Дукас на местото на настанот.
Сопствениците и соседите сведочат за застрашувачкиот интензитет на детонацијата што ги разбудила жителите и предизвикала материјална штета на околните објекти. Полицијата и истражните органи работат на целосно утврдување на причините за несреќата.