Според најновите податоци, во Непал загинале 626 лица, а уште седум во Тибет. Речиси 3.000 луѓе сè уште се водат како исчезнати, додека спасувачките екипи се соочуваат со тешки услови поради уништените патишта и мостови, лошото време и опасноста од нови поплави.
Катастрофата предизвика и огромна економска штета. Непалскиот министер за финансии Сварним Вагле проценува дека обновата може да чини меѓу 4 и 5 милијарди долари, што е речиси 10 проценти од економијата на земјата. Уништени или сериозно оштетени се патишта, мостови, населени места и друга инфраструктура, вклучително и делови од патната мрежа што го поврзува Непал со Кина.
Сериозно е погоден и енергетскиот сектор. Поплавите оштетиле повеќе хидроенергетски објекти кои заедно обезбедуваат повеќе од 12 проценти од производството на електрична енергија во земјата.
Според проценките на Меѓународната федерација на Црвениот крст и Црвената полумесечина, околу 93.000 луѓе можеби се погодени од поплавите. Организацијата веќе упатила итен апел за 25 милиони швајцарски франци за помош на населението во најпогодените области.
Властите предупредуваат дека опасноста сè уште не е мината и дека се можни нови поплави и одрони, додека потрагата по исчезнатите продолжува.