Пензиите од септември ќе пораснат за околу 3 до 3,5 проценти, а точниот процент ќе биде познат на почетокот на следната недела, најави министерот за социјална политика, демографија и млади Ѓоко Велковски.
Според него, за конечната пресметка се чека да заврши август, по што ќе бидат достапни сите потребни параметри. Новото усогласување ќе биде вклучено во септемвриската пензија, која пензионерите ќе ја добијат на 1 октомври.
„Се чека да заврши август и веќе следната недела ќе ги имаме параметрите и ќе излеземе со конкретни бројки, бидејќи треба да влезат во исплата на септемвриската пензија што ќе се земе на 1 октомври“, изјави Велковски во гостување на ТВ Сител.
Тој посочи дека засега останува во сила законското решение според кое пензиите се усогласуваат процентуално. Претходно пензиите беа зголемени линеарно за вкупно 7.000 денари.
Велковски не ја исклучи можноста во иднина да има и дополнителни интервенции, но рече дека тие ќе зависат од движењето на економските параметри и одлуките на Владата. Следното редовно законско усогласување е предвидено за март 2027 година.
Премиерот Христијан Мицкоски претходно најави дека понатамошниот раст на пензиите ќе се врши согласно законскиот модел на усогласување, со образложение дека на тој начин се обезбедува правна сигурност за пензионерите.