Општина Аеродром го издаде првото одобрение за градење со комплетно ослободени комуналии, мерка која неодамна беше усвоена од Советот на општината. Првиот жител кој ја искористи оваа поволност е Гоце од Долно Лисиче, со што и официјално започна имплементацијата на поддршката за младите при решавање на станбеното прашање.
Според одлуката на Општината, сите млади лица до 35 години кои градат, доградуваат или надградуваат сопствен дом, добиваат целосно ослободување од комуналиите во делот што и припаѓа на Општина Аеродром. Оваа мерка беше усвоена уште на првата седница на новиот состав на Советот со цел да им се даде директен поттик на младите семејства.
„Овој момент не е само административен чекор – туку симбол на нов почеток, сигурност и поддршка за младите кои храбро чекорат кон својот прв дом“, соопштија од локалната самоуправа, упатувајќи честитки до првиот корисник и до сите млади кои одлучуваат да живеат во оваа општина.