Управата за јавни приходи (УЈП) информира дека презема активности за завршување на процесот на регистрација во системот е-Даночни услуги (Е-ППД) кај граѓаните кои поднеле барање за креирање кориснички профил, но постапката не ја завршиле целосно.
По направените проверки во системот, утврдено е дека повеќе од 35.000 граѓани имаат започнато регистрација на кориснички профил како даночни обврзници – физички лица, но процесот останал незавршен.
Од УЈП информираат дека до овие граѓани се испратени персонализирани пораки преку електронската пошта info@ujp.gov.mk со насоки за понатамошните чекори.
Граѓаните кои се опфатени со оваа активност потребно е да се обратат до надлежната канцеларија на УЈП со важечки документ за идентификација, за овластено службено лице да ја одобри регистрацијата.
Од УЈП потсетуваат дека активниот профил на е-Даночни услуги овозможува користење електронски услуги, увид во податоците од Годишната даночна пријава за данок на личен доход, добивање уверенија за остварен доход и остварување различни права поврзани со институциите.
Преку овој профил граѓаните можат да го користат и правото за враќање дел од данокот на додадена вредност преку апликацијата „МојДДВ“, за што е потребна регистрација во системот е-Даночни услуги.
За дополнителни информации, граѓаните можат да се обратат до УЈП преку електронската адреса info@ujp.gov.mk или на телефонските броеви 02/3253-200 и 0800 33 000.