Во судницата во затворот „Идризово“ денеска продолжува доказната постапка за катастрофалниот пожар во кочанската дискотека „Пулс“, во кој животот го загубија 63 лица. Пред судијката Дијана Груевска Илиевски денеска треба да сведочат пет лица предложени од Обвинителството, вклучително и законски застапници на оштетените.
Процесот го одбележаа дебати меѓу одбраната и обвинителството околу целисходноста на постапката. Адвокатот Петре Шилегов побара преиспитување на обвинението за дел од обвинетите, повикувајќи се на информации од ОЈО ГОКК за запирање на постапки против службени лица.
„Од Обвинителството се контрадикторни за ист настан и исти околности против службени лица. За мене извесен е исходот со ваквиот став на Обвинителството. Мислам дека е поцелисходно наместо да продолжиме, Обвинителството да се преиспита. Едно судење државата ја чини 150 илјади евра“, изјави Шилегов.
Од друга страна, обвинителот Борче Јанев останува на ставот дека обвинителниот акт е правосилен и дека фокусот мора да биде на утврдување на одговорноста за претворањето на објектот во „смртоносна стапица“. Сите обвинети, вклучувајќи го и сопственикот Дејан Јованов, досега се изјаснија за невини.