Во Основниот кривичен суд во Скопје денеска продолжи судењето против 13 полициски службеници од Кочани и Штип, обвинети во случајот поврзан со трагичниот пожар во дискотеката „Пулс“ во Кочани. Според обвинителството, полицајците кои биле присутни критичната вечер не постапиле според акциските протоколи и не го спречиле користењето пиротехнички средства, пренесува 4news.mk.
На денешното рочиште предвидено е сослушување на двајца сведоци предложени од одбраната. Првиот сведок, вработен во Територијалната противпожарна единица во Кочани, сведочеше за интервенцијата во кобна ноќ. Тој наведе дека дежурал кога пристигнала дојавата за пожар во 2:35 часот, а поради слабиот сообраќај стигнале до објектот за нешто помалку од пет минути.
Во својот исказ тој истакна дека полициските службеници веќе го обезбедиле пристапот до објектот кога тие пристигнале. Според него, полицајците ја расчистиле улицата и ослободиле простор на паркингот, овозможувајќи противпожарното возило да се позиционира и непречено да интервенира.
Судскиот процес продолжува со изведување докази и сослушување сведоци.