Министерот за надворешни работи и надворешна трговија, Тимчо Муцунски, денеска ќе престојува во еднодневна работна посета на Босна и Херцеговина, каде што ќе оствари средба со министерот за надворешни работи на земјата, Елмедин Конаковиќ.
Како што информираат од Министерството за надворешни работи и надворешна трговија, посетата се реализира на покана на министерот Конаковиќ, а во нејзин фокус ќе бидат билатералните односи и можностите за натамошно унапредување на соработката меѓу двете земји.
Се очекува на средбата да биде потврдена одличната соработка и партнерските односи, како и да се разговара за прашања од заемен интерес, вклучително и европската перспектива на регионот и процесот на интеграција во Европската Унија.
Од Министерството посочуваат дека соговорниците ќе разменат мислења и за можностите за продлабочување на економската соработка, со посебен акцент на јакнењето на надворешната трговија и развојот на нови форми на економско партнерство.