Регионалната школа за срцева слабост додели две плакети како благодарност за поддршката во организацијата на второто издание на меѓународната конференција. Едната плакета ѝ беше доделена на Стопанската комора на Северна Македонија, додека посебно признание доби и нејзиниот претседател Бранко Азески.
Организаторите изразија надеж дека Регионалната школа за срцева слабост ќе продолжи да се одржува и во наредните години, со цел да придонесе кон размена на знаења и унапредување на медицинската пракса во регионот.
Срцевата слабост е често заболување и, и покрај намалувањето на стапката на некои други кардиоваскуларни заболувања, бројот на пациенти со срцева слабост продолжува да расте. Како фактори за овој тренд се наведуваат стареењето на населението и подобреното преживување кај други кардиоваскуларни заболувања.
Европското кардиолошко здружение, согласно актуелните препораки, посочува дека пациентите со срцева слабост треба да се третираат преку мултидисциплинарен пристап и со јасно дефинирани приоритети.
Континуираната едукација на кардиолозите и медицинскиот персонал е важен дел од обезбедувањето соодветна грижа за пациентите, поради што ваквите стручни настани имаат значајна улога во размената на искуства и знаења.
Стопанската комора на Северна Македонија, на иницијатива на Македонското здружение по кардиологија, втора година по ред ја поддржува организацијата на Регионалната школа. Од Комората велат дека иницијативата ја гледаат и како можност за поширок општествен придонес кон јавното здравје и подигнување на свеста за превенцијата од кардиоваскуларни заболувања.
Во рамки на иницијативата се развива и партнерство со Европското кардиолошко здружение, Европската асоцијација за срцева слабост и водечки европски кардиолошки центри, меѓу кои Центарот за срце во Цирих и Центарот за срце во Лондон. Целта е на учесниците да им се овозможи пристап до најновите научни сознанија, како и практична и интерактивна едукација за дијагностика и третман на срцевата слабост.
Второто издание на Регионалната школа за срцева слабост се одржа во Скопје кон крајот на минатата недела, во соработка со Европското кардиолошко здружение и Европската асоцијација за срцева слабост. На школата учествуваше и актуелниот претседател на Европското кардиолошко здружение, проф. д-р Томас Лушер.
Најавено е дека школата ќе биде лиценцирана и валидирана како официјален едукативен настан во рамки на Европското кардиолошко здружение.