Претседателката Гордана Сиљановска-Давкова, која престојува во официјална посета на Република Словачка, денеска во Братислава ќе биде пречекана со највисоки државни и воени почести од словачкиот претседател Петер Пелегрини.
Според агендата на посетата, двајцата претседатели најпрво ќе одржат тет-а-тет средба, по што ќе следи пленарен состанок на македонската и словачката делегација.
Во текот на денот, Сиљановска-Давкова ќе се сретне и со претседателот на Националниот совет на Словачка, Рихард Раши, како и со потпретседателот на Владата и министер за одбрана на Словачка, Роберт Калињак.
Во рамки на официјалната посета, македонската претседателка ќе положи венец пред Споменикот на слободата во меморијалниот комплекс Девин.
Утре, Сиљановска-Давкова ќе го посети Националниот центар за култура и образование во Братислава, каде што е поставена групната изложба „Од глаголица до светлина: Визуелна ода за Св. Кирил и Методиј“. На изложбата се претставени дела од македонските уметници Ана Митевска, Ангел Коруновски, Лазе Трипков и Александра Костадиновска, а куратор е Кирил Пенушлиски.