„Во моментов не сме соочени со нестабилност и нема закана по безбедноста ниту во земјата ниту во регионот. Постојат механизми за рано предупредување, институциите внимателно ја следат состојбата и меѓусебно се координираат, врз основа на што ја даваме оваа оценка за стабилност и сигурност“, изјави Гордана Сиљановска-Давкова по седницата на Советот за безбедност, на која се разговараше за безбедносната состојба во земјата по најновите случувања на Блискиот Исток.
Таа посочи дека институциите и натаму ќе продолжат внимателно да ја следат состојбата.
„Во постојана координација сме и со надлежните органи во регионот и ќе разменуваме информации“, најави претседателката Сиљановска-Давкова.
Со седницата претседаваше Сиљановска-Давкова, а присуствуваа претседателот на Собранието Африм Гаши, премиерот Христијан Мицкоски, министерот за внатрешни работи Панче Тошковски, министерот за одбрана Владо Мисајловски, како и експертите Џевдет Хајредини, Малинка Ристевска Јорданова и Владо Спиридонов.
Министерот за надворешни работи и надворешна трговија Тимчо Муцунски, кој престојува во САД, на седницата се вклучи преку видеоврска.
На состанокот присуствуваа и директорката на Агенцијата за разузнавање, Габриела Јаковлева, директорот на Агенцијата за национална безбедност, Бојан Христовски, како и началникот на Генералштабот, генерал-мајор Сашко Лафчиски.