Од првиот момент по невремето, 4 екипи на ЈКП Гази Баба се на терен и непрекинато работат на санирање на последиците, информира градоначалникот на Гази Баба Бобан Стефковски на социјалните мрежи.
Невремето предизвика сериозни штети. Евидентирани се повеќе од 40 паднати дрва, а оштетен е и кровот на ООУ „Наум Наумовски – Борче“.
И јас сум на терен заедно со екипите и ќе останам тука сѐ додека не ги надминеме последиците и не обезбедиме нормално функционирање.
Ги молам граѓаните за разбирање, трпение и внимателно движење додека траат интервенциите.
Расчистувањето се одвива во две фази. Најнапред приоритет им даваме на главните и најфреквентни сообраќајници, за да се овозможи безбедно движење на граѓаните и непречено функционирање на службите.
Во втората фаза ќе биде расчистено секое паднато дрво, без исклучок.
Во овој момент веќе е воспоставена проодност на регионалниот пат Хиподром – Илинден, кој поради невремето беше целосно во прекин.
Нема откажување кога граѓаните имаат потреба. Работиме организирано, посветено и одговорно – сѐ додека целосно не се санираат последиците.
Гази Баба е силна затоа што делуваме веднаш, заедно и во интерес на секој граѓанин, пишува Стефковски на ФБ.