Собраниската Комисија за финансирање и буџет денеска ќе ја отвори расправата за Предлог-ребалансот на Буџетот за 2026 година, кој е во второ читање. За предложените измени се поднесени вкупно 224 амандмани.
Со ребалансот се предвидува зголемување на вкупните буџетски приходи на 379,2 милијарди денари, додека расходите се проектирани на 425,2 милијарди денари. Најголемо зголемување има кај капиталните инвестиции, за кои се обезбедени околу 46 милијарди денари, односно речиси 5,8 милијарди повеќе од првичниот план.
Проекциите на Владата остануваат економски раст од 3,5 проценти, инфлација од 4,5 проценти и буџетски дефицит од 4,1 процент од бруто-домашниот производ.
Министерката за финансии Гордана Димитриеска-Кочоска изјави дека измените имаат цел да обезбедат дополнителна поддршка за развојни проекти и инфраструктурни инвестиции, нагласувајќи дека зголемениот дефицит ќе биде насочен кон капитални вложувања, а не кон тековна потрошувачка.
Според предложените измени, даночните приходи остануваат речиси непроменети, додека неданочните приходи се зголемуваат поради подобра наплата на административните такси, концесиите и сопствените приходи на буџетските корисници. Во исто време, средствата за стоки и услуги се намалуваат преку пренамена кон приоритетни проекти.
Со ребалансот се предвидува продолжување на инвестициите во патната и железничката инфраструктура, изградба на водоводни и канализациски системи, пречистителни станици и проекти за управување со отпад.
Буџетскиот дефицит, заедно со обврските за отплата на јавниот долг, ќе се покрива преку домашно и странско задолжување, при што најголем дел од средствата ќе бидат наменети за сервисирање на постојните кредитни обврски.