Во првата половина од годината, односно во периодот јануари–јуни, вкупните приходи во Буџетот се реализирани во износ од 170 милијарди денари (169,9 милијарди денари), што претставува раст од 8,6% во однос на истиот период од претходната година и реализација на планот од над 45%.
Министерката за финансии Гордана Димитриеска-Кочоска во експозето за ребалансот на Буџетот за 2026 година, во рамки на комисиската расправа во Собранието, оцени дека јавните финансии се стабилни, приходната страна се движи согласно очекувањата, а расходите се насочени кон исполнување на законските обврски и приоритетните развојни политики.
Таа истакна дека најголемиот дел од приходите произлегуваат од редовната економска активност. Даночните приходи изнесуваат 96,7 милијарди денари, при што приходите од ДДВ се 43,3 милијарди денари и учествуваат со околу 44,7% во вкупните даночни приходи. Приходите од данок на личен доход се 17,5 милијарди денари, од данок на добивка 13,8 милијарди денари, додека од акцизи се реализирани 13,9 милијарди денари.
Според податоците, забележан е раст на приходите од данок на личен доход од 11,7%, данок на добивка од 14,5%, ДДВ од 16,4%, како и раст од 8,3% кај увозните давачки.
Министерката оцени дека ова претставува показател за продолжена економска активност, функционирање на компаниите, раст на платите и поефикасна наплата со намалување на сивата економија.
Во истиот период, социјалните придонеси како клучен извор за финансирање на пензискиот и здравствениот систем достигнаа 58,8 милијарди денари, што претставува раст од 7,5% во однос на лани.
На расходната страна, буџетот е реализиран во износ од 205,9 милијарди денари, во насока на навремено исполнување на законските обврски кон граѓаните и стопанството.
Исплатен е поврат на средства по основ на солидарниот данок во висина од 1,2 милијарди денари, за пензии се издвоени 58,1 милијарди денари, за здравство 25,5 милијарди денари, а за социјална заштита 7,6 милијарди денари. Кон општините се трансферирани 15,1 милијарди денари блок-дотации, како и дополнителни 2,4 милијарди денари од ДДВ.
Во првата половина од годината, државата ги сервисирала сите обврски кон домашните и странските кредитори. За камати се исплатени 12 милијарди денари, а за отплата на главнина 60,7 милијарди денари, што според министерката е важно за одржување на довербата на инвеститорите и меѓународните финансиски институции.
Таа нагласи дека финансиската дисциплина и редовното сервисирање на обврските остануваат приоритет.
Капиталните расходи во овој период изнесуваат 19,4 милијарди денари, што е раст од 53,5% на годишно ниво. Овие средства се насочени кон инфраструктура, училишта, градинки, здравствени објекти, енергетика и локален развој. За Коридорите 8 и 10-д се реализирани 6,3 милијарди денари, а за општински инфраструктурни проекти 2,1 милијарди денари.