Во изминатите 24 часа во земјава се регистрирани 29 пожари на отворен простор, од кои шест се активни, еден е ставен под контрола, а 22 се целосно изгаснати, информира Центарот за управување со кризи (ЦУК).
Активни пожари се регистрирани во Општина Студеничани, во близина на селата Моране, Вртекица и Рамни Габер, како и во Општина Македонски Брод, кај месноста Видуш и селата Драгов Дол, Локвица и Девич.
Пожари има и на подрачјето на општините Велес и Зелениково, во близина на селата С’лп, Горно Село, Карабуниште, Бузалково, Добрино и Тисовица.
Активни се и пожарите во општините Јегуновце и Сарај, кај селата Копанце, Туденце и Бојане, како и во Општина Прилеп, кај селото Чаниште, и во Општина Долнени, кај селата Вранче и Бело Поле.
Пожарот на депонијата во Делчево е ставен под контрола.