Министерството за внатрешни работи (МВР) информира дека полициските службеници се на терен и постапуваат по сите пријави поврзани со последиците од силното невреме, во координација со останатите надлежни институции. Во тек се активности за обезбедување на безбедноста на граѓаните, расчистување на штетите и нормализирање на сообраќајот.
Според МВР, најголеми последици се регистрирани на подрачјето на СВР Скопје, каде до 22 часот вчера биле евидентирани 117 оштетени патнички возила, 35 оштетени покриви, 189 паднати дрвја, седум оштетени семафори, пет пожари и 10 повредени лица.
Материјална штета е пријавена и на повеќе објекти од витално значење, меѓу кои Основното јавно обвинителство за гонење организиран криминал и корупција, комплексот „Вили Водно“, Аеродромската полициска база Петровец, објектот „Нова Македонија“, како и зградите на Министерството за финансии, Министерството за земјоделство и Јавното обвинителство.
Во СВР Куманово се пријавени девет оштетени возила и три оштетени покриви, додека на подрачјето на СВР Тетово се евидентирани пет случаи – три оштетени возила и две оштетени кровни конструкции. Во Гостивар нема пријавени оштетувања ниту повредени лица.
Во СВР Велес се регистрирани две оштетувања на возила предизвикани од паднати дрвја, а во СВР Штип 14 оштетени патнички возила и шест оштетени кровови.
На подрачјето на СВР Струмица пријавени се паднати електрични столбови во селата Доброшинци и Градошорци, како и прекин во снабдувањето со електрична енергија во селото Свидовица.
Од СВР Битола информираат дека не се регистрирани поголеми последици од невремето, освен краткотраен силен ветер на подрачјето на Полициската станица Македонски Брод, без материјална штета.
Во рамки на Регионалниот центар за гранични работи Север, најсериозни последици се забележани на Граничниот премин Меѓународен аеродром Скопје, каде поради протекување на кровот бил прекинат излезот од државата во времетраење од околу час и половина.
Во Транзитниот центар Табановце се оштетени дел од привремените објекти за сместување на мигранти, а регистрирани се и паднати дрвја, без поголема материјална штета.
Од МВР велат дека полициските екипи и натаму остануваат на терен и продолжуваат со расчистување на последиците од невремето и преземање мерки за заштита на граѓаните.