Тринаесетгодишното момче кое пред повеќе од три недели беше тешко повредено со нож во физичка пресметка во Чаир, им подлегна на повредите. Инцидентот се случи на 31 август на улицата „Македонско-косовска бригада“, а во него учествувале четири малолетници и еден 19-годишник. Полицијата тогаш запленила три ножеви и гумена палка.
Случајот повторно ја отвори темата за врсничкото насилство и употребата на ладно оружје меѓу малолетници. Обвинителството првично го водело случајот како „насилство“, а по смртта на момчето се очекува правна преквалификација на делото.
Според податоци на УНИЦЕФ , секое десетто дете на возраст од 11 до 15 години редовно е жртва на малтретирање во училиште, а 23 проценти од младите пријавиле дека биле изложени на некаков облик на врсничко насилство.
По трагичниот случај, од граѓанскиот сектор бараат подолгорочни превентивни програми во училиштата, поголемо присуство на полицијата околу ризичните локации и поефикасна реакција на институциите.