Пет афроамерикански деца кои беа принудени да трпат тешка злоупотреба од нивните посвоители и беа држени во услови слични на ропство ќе добијат финансиска компензација од 4,4 милиони долари од државата Западна Вирџинија, пренесува „Дејли Меил“.
Спогодбата доаѓа поради пропустите во постапувањето на Службите за заштита на децата по повеќекратните пријави од загрижени граѓани. Средствата ќе бидат распределени преку специјален фонд за закрепнување на жртвите. Адвокатот Данте ди Трапано, кој ги застапуваше децата, изјави:
– Ова значи дека овие деца ќе добијат шанса да бидат деца. Тие беа ограбени од нивната невиност и детство од луѓе кои беа нивни родители, кои всушност беа чудовишта.
Случајот излезе на виделина во октомври 2023 година, кога полицијата ги пронајде постарите деца заклучени во барака без светлина, храна и вода во Сисонвил, додека деветгодишно девојче било затворено во главната куќа. Нивните посвоители, Џин Кеј Вајтфедер и Доналд Лантс, претходно беа осудени на драконски казни од 215 и 160 години затвор. Посвоителката тогаш тврдела дека објектот бил „тинејџерски клуб“.
И покрај бројните пријави од соседите кои сведочеле за тешка физичка работа и изнемоштеност на децата, надлежните социјални служби не реагирале соодветно. Адвокатот Ди Трапано истакна дека целиот систем потфрлил, нагласувајќи:
– Имаше многу повици од соседите, и мислам дека имаше само една посета на таа куќа. Требаше да има многу повеќе.
Заштитниците на детските права најавуваат нови правни чекори и законски иницијативи за зајакнување на надзорот, додека жртвите веќе се згрижени во нови семејства.