Врнежите од дожд во Албанија почнаа да се намалуваат во поголемиот дел од земјата, освен во Драч, но последиците од невремето остануваат сериозни. На состанок на Меѓуминистерскиот комитет за цивилни вонредни ситуации, премиерот Еди Рама соопшти дека досега се евидентирани 1.587 поплавени домови и други објекти, а евакуирани се 339 лица и 51 семејство. Тој потврди и една жртва – вработен во комуналната служба на општина Драч.
Под вода се наоѓаат и 13.211 хектари земјоделско земјиште, што може да предизвика сериозни последици врз производството и снабдувањето. Рама нагласи дека во некои средини вода навлегла и во здравствени центри и образовни установи, додавајќи дека во последните три до четири дена паднале до 300 милиметри дожд на квадратен метар – количина што вообичаено се собира за еден месец. Тој го поврза интензитетот на врнежите со климатските промени и најави надомест на штетите.
Вицепремиерката и министерка за инфраструктура и енергетика, Белинда Балуку, оцени дека состојбата денеска е подобра на национално ниво и дека снабдувањето со електрична енергија е речиси стабилизирано. Таа посочи дека над 1.600 вработени се на терен од 2 јануари, со фокус на најпогодените области Тирана, Драч, Валона, Ѓирокастро и Елбасан, додека северот е под надзор, но со помали проблеми поради претходни инвестиции.
Министерката за внатрешни работи, Албана Кочиу, информираше дека низ целата земја се распоредени околу 5.500 службеници на државната полиција со околу 700 возила. Противпожарната служба ангажира над 720 службеници, 55 противпожарни возила и 22 пумпи во најкритичните области, додека службите продолжуваат со интервенции и проценка на штетите.