По вчерашната четиричасовна средба со премиерот Киријакос Мицотакис, грчките земјоделци попладнево ќе одржат клучни состаноци на кои ќе одлучат за понатамошните чекори. Главната дилема е дали да се продолжат блокадите на патиштата и граничните премини ширум земјата или да се повлечат тракторите.
Иако патиштата и премините во моментов се отворени во исчекување на одлуката, првичните реакции од претставниците на земјоделците не се оптимистички. Тие изјавија дека „не се многу задоволни“ од дискусијата со премиерот, што ја остава отворена можноста за радикализација на протестите.
Бранот незадоволство започна уште на 30 ноември минатата година. Земјоделците бараат решенија за високите трошоци за производство, ниските откупни цени на производите и проблемите со доцнењето на исплатата на субвенциите од европските фондови.