Тимови на Дирекцијата за заштита и спасување (ДЗС) во текот на изминатите два дена и ноќеска беа интензивно ангажирани на терен во критичните точки во Кичевско и Ресенско, координирајќи се со локалните служби од Системот за управување со кризи, соопшти ДЗС.
Подрачното одделение на ДЗС Кичево дејствуваше во „Прилепска населба“, која е една од најпогодените од поплавите. За потребите на евакуираното население, ДЗС обезбеди и транспортираше 30 полски кревети и поголема количина ќебиња. Опремата е поставена во спортската сала „Македонија“ во Кичево, која е претворена во привремен центар за згрижување на лицата чии домови настрадаа од водената стихија.
Паралелно се дејствуваше и во Ресенско. Таму тимовите на ДЗС со специјални пумпи ја црпеа навлезената вода од подруми, куќи и други објекти. Поради сериозноста на состојбата, во приправност бил ставен и специјален тим со два чамца, но за среќа, немало потреба од нивна употреба.