Денеска во Скопје, со почеток во 12:30 часот, ќе се одржи протестен марш на група граѓани кои изразуваат незадоволство поради неспроведувањето на Законот за употреба на јазиците при полагањето на правосудниот испит. Протестот ќе започне од плоштадот „Карпошово востание“, ќе продолжи преку Камениот мост и ќе заврши пред Министерството за правда.
Министерството за внатрешни работи најави посебен режим на сообраќај долж трасата на движење.
„СВР Скопје-Единицата за безбедност на патниот сообраќај ќе преземе мерки за посебен режим на сообраќајот. МВР апелира до сите граѓани учесници во сообраќајот да се почитуваат наредбите кои ќе ги даваат униформираните полициски службеници“, соопштија од полицијата.
Премиерот Христијан Мицкоски упати апел до учесниците да не бидат „алатка во рацете на политичка партија“. Тој појасни дека делот од законот што се однесува на правосудството е оспорен пред Уставниот суд и има негативно мислење од Венециската комисија.
„Јас ги уверувам студентите дека онака како што се најдоа решенија за многу предизвици и за многу пропусти од минатото, така и за ова ќе се изнајде соодветно решение. Мојот апел е да не дозволат да бидат алатка во рацете на политичка партија, која сè уште живее во спомените, односно во минатиот век“, истакна Мицкоски.
Од друга страна, градоначалникот на Чаир, Изет Меџити, оцени дека протестот е повик за освестување и подобри законски решенија.
„Јазичната политика во Македонија, за жал, е уредена со половичен закон. Половични закони даваат половични решенија. Протестот е повик за освестување за сите политички и општествени актери кои треба да придонесат за подобри решенија“, изјави Меџити.