По осум месеци од катастрофалниот пожар во дискотеката „Пулс“ во Кочани, денеска започнува судскиот процес во кој 63 лица го загубија животот, а над 200 беа повредени. Првото рочиште е закажано во КПУ Идризово, под засилени безбедносни мерки.
Обвинението опфаќа 38 обвинети (35 физички и 3 правни лица) кои се товарат за Тешки дела против општата сигурност. Меѓу обвинетите се сопственици на локали, управители, инспектори, тројца поранешни градоначалници на Кочани, членови на обезбедувањето и државни службеници.
Според истрагата, трагедијата е резултат на долгогодишни пропусти и свесно игнорирање на безбедносните процедури. Јавниот обвинител Љупчо Коцевски нагласи дека секоја институција и поединец имале законска обврска да го спречат ризикот, но „никој тоа не го направил“.
- Незаконско работење: Објектот работел незаконски од 2012 година, без минимално-технички услови и со реконструкции без дозволи.
- Игнорирање на инспекции: Обвинети се тројца градежни инспектори од Општина Кочани кои не спровеле надзор и свесно дозволиле објектот да работи.
- Непостапување на локалната власт: Обвинети се тројца поранешни градоначалници на Кочани кои од 2012 до 2025 година не презеле мерки за затворање на небезбедниот објект.
- Небезбедност: Управителите и сопствениците на клубот се товарат за незаконско работење, пречекорување на капацитетот, дозволување влез на малолетници и употреба на пиротехника.
- Пропусти во ДЗС: Обвинети се и директори и инспектори од Дирекцијата за заштита и спасување (ДЗС) кои не спровеле мерки за заштита од пожари.
Обвинението утврди дека на критичната вечер, за време на настапот на групата ДНК, биле договорени и употребени три нелегално набавени пиротехнички уреди без дозвола. Ова, во комбинација со прекумерниот број посетители (меѓу кои и деца), директно довело до катастрофалниот пожар.
Судењето ќе го води судијката Диана Груевска Илиевска, со темпо од две рочишта неделно, а обвинителството е застапувано од тим од 15 јавни обвинители. Во меѓувреме, семејствата на жртвите продолжуваат со „Маршот на ангелите“, барајќи правда и целосна одговорност.