Со 67 гласа „за“, 13 „против“ и без ниту еден воздржан, Собранието на денешната седница ја утврди потребата од донесување по скратена постапка на Предлог-законот за изменување на Законот за Владата на Република Македонија. Со ова, законското решение ја мина првата и клучна фаза од собраниската процедура.
Целта на предложените измени е суштинска – укинување на моделот на преодна, односно техничка влада, кој со години наназад беше воспоставуван како начин за организирање на изборните процеси.
Во образложението на предлагачот, односно Владата, се посочува дека новото законско решение ќе обезбеди поголема стабилност, правна сигурност и заштита на јавниот интерес. Власта смета дека е време институциите да ја преземат целата одговорност, без потреба од ад-хок политички договори кои ги оптоваруваа функционирањето на државата.
„Заради потребата од рационално и одговорно користење на јавните финансии, зајакнување на институционалната стабилност и обезбедување целосен демократски легитимитет на Владата… со овој предлог-закон се воспоставува јасна и применлива правна рамка која ќе гарантира фер и транспарентни избори“, се вели во образложението.
Со овие измени се планира елиминирање на досегашните привремени решенија воспоставени со политички договори, со што се става крај на практиката на технички влади, а фокусот се става на институционалното делување гарантирано со Уставот и законите.