Предлог-законот за заштита од употреба на производи од тутун или сродни производи вчера помина во прво читање на пленарна седница во Собранието, што претставува, како што се наведува, важен институционален чекор кон зајакнување на заштитата на јавното здравје, особено кај децата, младите, непушачите и сите граѓани.
Како што појаснува министерот за здравство Азир Алиу во соопштението од Министерството за здравство, законот ја следи актуелната состојба на пазарот, каде покрај класичните цигари се присутни и електронски цигари, загреани тутунски производи и други нови никотински производи, кои бараат современа и јасна регулатива.
Се посочува дека тутунот е поврзан со над 3.600 смртни случаи годишно, додека економските загуби се проценуваат на над 600 милиони евра. Дополнително, податоците укажуваат дека 13,6% од младите на возраст од 13 до 15 години користат тутунски или никотински производи, 57% од учениците се изложени на чад во затворени простори, а 73% од младите пушачи изјавиле дека не биле спречени да купат цигари поради возраста.
Со законското решение се воведуваат појасни правила за користење тераси, поголема заштита во здравствени, образовни и детски установи, ограничувања за пушење во присуство на деца, како и сеопфатна забрана за рекламирање и промоција, вклучително и преку онлајн платформи и социјални мрежи.
Министерот Алиу истакнува дека „здравјето нема цена и нема алтернатива“, нагласувајќи дека зад подготовката на законот стои инклузивен процес на консултации со сите засегнати страни, во кој се одржани 7 работни состаноци со тутунската индустрија, 5 со угостителскиот сектор, усогласувања со државни институции и 14 инспекциски и надзорни органи, како и разгледување на 58 коментари пристигнати преку ЕНЕР.