Словенија останува цврст поддржувач на европската интеграција на Северна Македонија и активно ќе се залага за забрзување на пристапниот процес на земјите од Западен Балкан во Унијата, порача денеска словенечката претседателка Наташа Пирц Мусар по средбата со македонската претседателка Гордана Сиљановска-Давкова.
На заедничката прес-конференција во Љубљана, Пирц Мусар појасни дека нејзината земја е дел од група од 15 членки на ЕУ кои предлагаат отворањето на преговарачките поглавја за земјите кандидатки да се одвива со квалификувано мнозинство, додека консензусот да остане само за конечниот прием.
Таа укажа на фактот дека пред државите-аспиранти се поставува огромен товар за прилагодување кон европското право, додека Брисел премалку прави за процесот да биде побрз.
„На државите кандидатки им наметнуваме огромен товар за усогласување со европското законодавство. Кога Словенија влезе во Европската Унија во 2004 година, требаше да усогласиме околу 80.000 страници од европското законодавство, а денес земјите кандидати мора да усогласат околу 95.000 страници. Истовремено, премалку се прашуваме што може да направи Европската Унија за процесот да биде побрз и поефикасен“, истакна Пирц Мусар.
Според неа, сегашниот модел на одлучување овозможува билатерални прашања и политички блокади да го кочат проширувањето.
„Денес Северна Македонија е во ситуација поради една земја членка да не може да отвори ниту едно поглавје. Тоа едноставно не е коректно и не е фер кон држава која сака да стане дел од Европската Унија“, нагласи словенечката претседателка.
Таа додаде дека ЕУ е пред сè мировен проект кој носи стабилност, поради што за Западен Балкан членството мора да биде единствениот вистински пат.
„Европската Унија пред сѐ е мировен проект. Новите членки носат стабилност и мир во регионот. За Западен Балкан, членството во Европската Унија мора да биде единствениот вистински пат кон стабилност“, рече таа.
Македонската претседателка Сиљановска-Давкова направи паралела со регионалната поддршка што скандинавските земји им ја давале на балтичките држави и посочи дека Словенија е таков пример на Балканот.
„Ако не сме спремни да го разбереме соседот во регионот и да го поддржиме, како може да очекуваме разбирање и поддршка во Брисел? Мислам дека тоа е логично и природно“, истакна Сиљановска-Давкова, поздравувајќи ја словенечката помош и регионалната солидарност.