СДС, ДУИ и Арбен Таравари повторно покажаа дека имаат двојни аршини кога се во прашање нивните функционери, обвини денеска пратеникот на ВМРО-ДПМНЕ, Бране Петрушевски.
Според него, опозициските партии молчат и го штитат градоначалникот на Гостивар, Валбон Лимани, по неговата изјава дека не чувствува одговорност за скандалот со водата.
Петрушевски истакна дека оние кои секојдневно бараат оставки, денес немаат никаква реакција за постапките на нивниот кандидат.
Пратеникот на ВМРО-ДПМНЕ порача дека за СДС, ДУИ и Таравари принципите важат само за напад врз политичките противници.
Тој јавно отвори повеќе прашања за постапувањето на општинските власти во Гостивар:
„Граѓаните заслужуваат одговори, а не двојни стандарди. Зошто СДС, ДУИ и Таравари не бараат реакција од општината за скандалот? Зошто општината по 3 дена од кога сите дознаа за скандалот се јави со прес-конференција? Зошто општинските служби немаат со прст мрднато?“
Петрушевски додаде дека поради неспособноста на општинските служби, Владата предводена од ВМРО-ДПМНЕ морала да ја земе работата во свои раце.
На крајот од прес-конференцијата, пратеникот заклучи дека на граѓаните им е јасно што може да се очекува од СДС, ДУИ и Таравари кога се на власт.