Пратеникот од ВМРО-ДПМНЕ, Бране Петрушевски, експресно реагираше на веста дека поранешниот премиер Зоран Заев поднел тужба за клевета против него. Петрушевски порача дека не се плаши од судскиот процес и дека времињата на притисоци врз правосудството се минато.
Според пратеникот, институциите денес работат по закон, а не по партиски наредби, и тој е подготвен да ги соочи своите аргументи со Заев пред очите на јавноста.
„Тужбата за клевета нема да го испере Заев, ниту ќе ја скрие вистината. Завршија времињата кога од позиција на власт се нарачуваа пресуди, се вршеа притисоци врз обвинители и судии и се замолчуваа оние што поставуваа прашања. Денес, институциите мора да работат по закон, а не на телефон“, истакна Петрушевски.
Тој додаде дека стои зад секој свој јавно изнесен збор и дека судницата треба да биде место каде што ќе се утврди вистината, а не средство за заплашување на критичарите.