Пратеникот на ВМРО-ДПМНЕ, Бране Петрушевски, денеска упати жестоки критики до лидерот на СДСМ, Венко Филипче, обвинувајќи го дека партијата функционира врз основа на лаги и конструкции. Според Петрушевски, СДСМ по историскиот пораз на изборите каде паднаа на само 130 илјади гласови, продолжува да живее во свет полн со апсурд и фантазија.
Петрушевски нагласи дека опозицијата се обидува да ги претстави историските успеси на новата Влада како свои или пак да ги девалвира со дезинформации.
„СДС и Филипче, по стратешкиот договор со Велика Британија со кој ВМРО-ДПМНЕ ја стави Македонија на светската мапа, ширеа лаги дека договорот бил за мигранти. Филипче се однесува како Алиса во земјата на чудата – живеат во свет каде тие се најдобри, а рејтингот им се брои на една шака“, изјави Петрушевски.
Пратеникот додаде дека СДСМ треба итно да се разбуди од сонот и да се соочи со реалноста во која граѓаните јасно им ја ускратија довербата.