Пратеникот на ВМРО-ДПМНЕ, Бране Петрушевски, на денешната прес-конференција му порача на лидерот на СДС, Венко Филипче, да се фокусира на внатрешната состојба во партијата наместо да се грижи за економијата и државните политики.
Според Петрушевски, опозицијата постојано се противи на новите економски проекти, инвестиции и развојни иницијативи. Во тој контекст, тој нагласи дека економските показатели ја покажуваат спротивната слика:
– Во првите осум квартали по доаѓањето на СДС и ДУИ на власт, просечниот реален раст на БДП изнесувал околу 2,6 проценти. Во првите осум квартали на актуелната Влада предводена од ВМРО-ДПМНЕ, просечниот раст изнесува околу 3,55 проценти. И последниот официјален податок, дополнително ја потврдува позитивната динамика во економијата или во вториот квартал од 2026 година реалниот раст на БДП достигна 4,3 проценти.
Портпаролот на владејачкета партија заклучи дека нема простор за загриженост околу финансиските движења во земјата, порачувајќи му на Филипче:
– Филипче засега нека размисли како да ги смири страстите во опозицијата, ако воопшто сака да биде човек кој води сериозна партија, бидејќи вака СДС се движи кон пропаст.