Министерството за локална самоуправа става силен фокус на полицентричниот развој на државата преку директна поддршка на сите општини, бидејќи напредокот не смее да биде концентриран само на едно место или во еден регион.
Ова го истакна ресорниот министер Златко Перински пред членовите на собраниската Комисија за локална самоуправа, образложувајќи го Предлогот за измени и дополнувања на Стратегијата за регионален развој 2021-2031 година.
Перински појасни дека по пет години од спроведувањето на оваа Стратегија, сосема е оправдано да се направи објективен пресек – таму каде што има резултати да се продолжи со поголем интензитет, а каде што има слабости, да се направат соодветни корекции.
„Стратегијата беше подготвена врз основа на демографски податоци од период пред пописот на населението во 2021 година. Новата демографска слика мора да се вгради во начинот на планирање и спроведување на политиката. Покрај усогласувањето со новата демографска слика, ревидираната Стратегија обезбедува јасна усогласеност со Националната развојна стратегија 2024-2044“, посочи министерот Перински.
Собраниската Комисија, со која претседаваше пратеникот Драган Ковачки, во целост го прифати предлогот за изменување и дополнување на Стратегијата.