Заменик-директорот на Фондот на ПИОМ, Вахид Ферати, и директорката на Секторот за остварување права од ПИО, Билјана Стојанова, учествуваа на меѓународен семинар во Тирана, Албанија, посветен на подобрувањето на услугите во пензиските системи.
Семинарот, организиран од Европската мрежа на Меѓународната асоцијација за социјално осигурување (ИССА), се одржа под мотото „Зајакнување на услугите во пензиските шеми: Одговор на потребите на постарите лица“.
Настанот го отвори министерката за економија и иновации на Албанија, Делина Ибрахимај, која истакна дека функционирањето на пензискиот систем во голема мера зависи од неговата практична примена. На семинарот се дискутираше за новините во пензиските институции, условите за пензионирање, иновациите во системот и подобрувањето на достапноста на услугите за граѓаните.
Посебен акцент беше ставен на дигитализацијата и на начините дигиталните услуги да станат поедноставни и полесни за користење.
Генералниот секретар на ИССА, Марсело Аби-Рамија Каетано, зборуваше за демографските промени и нивното влијание врз пазарот на трудот.
Независниот експерт од Норвешка, Симон Симба, посочи дека пензијата, покрај финансиската сигурност, има важна улога и во социјализацијата и солидарноста. Тој ја истакна потребата од забрзана дигитализација, како и внимателен пристап при примената на вештачката интелигенција поради ризиците што може да ги носи нејзината употреба во институциите.
Учесниците разговараа и за условите и начинот на пресметка на пензиите во европските земји, доставувањето потврди за живот и склучувањето договори за електронска размена на податоци, со цел подобрување на квалитетот и ефикасноста на услугите.
На семинарот учествуваа претставници од Холандија, Чешка, Германија, Словачка, Полска, Португалија, Турција, Узбекистан, Франција, Србија, Австрија и Азербејџан.
Фондот на ПИОМ е долгогодишен член на Меѓународната асоцијација за социјално осигурување и активно учествува во нејзините активности.