Движењето „ЗНАМ – За наша Македонија“ ја поздрави победата на опозицискиот лидер Петер Маѓар на парламентарните избори во Унгарија, оценувајќи ја како важен сигнал за демократските процеси во Европа.
Од партијата истакнуваат дека промената на власта во Унгарија е значаен момент, а соработката меѓу двете земји во претстојниот период треба да се гради врз цврсти темели на меѓусебно почитување и споделување на европските принципи.
Во својата официјална честитка до новиот унгарски лидер, од „ЗНАМ“ порачаа:
„Победата на Петер Маѓар е сигнал за потребата од зачувување на демократските процеси. Соработката со Унгарија во иднина треба да се темели на споделување на заедничките европски вредности, кои се основа за стабилност и просперитет во целиот регион.“
Од партијата изразија уверување дека новата политичка реалност во Будимпешта ќе отвори простор за продлабочување на односите, со посебен фокус на економската и политичката стабилност, кои се од суштинско значење за земјите што се стремат кон европска интеграција.