Државниот завод за ревизија утврди низа неправилности во финансиското работење на ЈП „Паркинзи на Општина Центар“ – Скопје за 2024 година.
Ревизорите изразиле неповолно мислење за реалноста и објективноста на финансиските извештаи на претпријатието, како и мислење со резерва за усогласеноста на работењето со законската регулатива.
Во ревизорскиот извештај се посочува дека дел од опремата и градежните објекти, меѓу кои паркомати, монтажни конструкции и друга урбана опрема, не биле соодветно евидентирани, а не била пресметана ниту амортизација за средствата ставени во употреба во текот на 2024 година.
ДЗР утврдил и дека претпријатието има неплатени побарувања од 80,1 милиони денари, односно околу 1,3 милиони евра. Од нив, повеќе од 331 илјада евра се постари од шест години, за кои не биле преземени навремени мерки за наплата.
Ревизијата покажала и дека при отпис на побарувања во износ од 2,2 милиони денари не бил пресметан и уплатен данок на личен доход, со што, според ДЗР, биле помалку уплатени средства во државниот буџет.
Констатирани се слабости и кај пописот на средствата, сметководствените политики, заклучувањето на трговските книги и благајничкото работење.
Дополнително, ЈП „Паркинзи на Општина Центар“ има искажани обврски за комунална такса од 86,3 милиони денари, односно околу 1,4 милиони евра, кои не биле уплатени во Буџетот на Општина Центар.
Ревизорите утврдиле и неправилности при пресметката и исплатата на плати и надоместоци, слабости во јавните набавки, како и несоодветна организација на внатрешната ревизија.
Државниот завод за ревизија доставил препораки до надлежните институции и одговорните лица за отстранување на утврдените недостатоци и подобрување на финансиското управување во претпријатието.