Поранешната градоначалничка на Град Скопје, Данела Арсовска, преку објава на социјалните мрежи остро реагираше на изјавите на актуелниот градоначалник Орце Ѓорѓиевски и го повика јавно да се соочат во телевизиска дебата.
Арсовска побара од Ѓорѓиевски да ги објави сите податоци за долговите на градските институции и фирмите што соработуваат со Градот, со точни износи, фактури и датуми на обврските. Таа, исто така, побара да биде објавена и листата на 500 вработени за кои градоначалникот тврдеше дека не доаѓале на работа подолг период.
„Ако имаш аргументи, излези и соочи се на јавна дебата. Нема потреба од изговори и политички манипулации, граѓаните заслужуваат да ја знаат вистината“, порача Арсовска во својата реакција.
Од друга страна, Ѓорѓиевски вчера во интервју за Сител најави дека ќе спроведе сериозни проверки во сите јавни претпријатија и институции под надлежност на Град Скопје, со цел, како што рече, да се стави крај на неефикасноста и злоупотребите. Тој рече дека Град Скопје се соочува со огромен долг од 300 милиони евра.
Полемиката меѓу двајцата градоначалници се случува во период кога во градските претпријатија се спроведуваат кадровски и организациски промени, а јавноста со внимание ги следи нивните меѓусебни обвинувања.
Реагираше ВМРО-ДПМНЕ
„Колку поблиску до правдата, толку повеќе Данела Арсовска ќе е бучна и нервозна. И посакуваме да се надмине себе си и да ги победи своите стравови и болки. Борбата со таквите демони не е лесна, и и посакуваме среќа. Исто како и со соочувањето со правдата за хаосот што го остави зад себе, кој е неодминлив процес. Видовме дека подобро и поинакво Скопје може да функционира. Сите надлежни институции мора да се посветат на цунамито кое го остави Данела Арсовска“, велат од ВМРО-ДПМНЕ