Основниот кривичен суд Скопје изрече мерки за обезбедување присуство против двајца свои вработени, кои се осомничени за кривичното дело „Примање награда за противзаконито влијание“.
На лицето Г.А.А., вработен како судски полицаец, на 09.04.2026 година му е определен притвор во траење од 30 дена. Судот ја донел оваа одлука поради основано сомневање за сторено кривично дело, при што утврдил опасност од бегство и можност за влијание врз сведоци и докази. Против ова решение не е поднесена жалба и е правосилно.
За вториот осомничен, Ф.Џ., вработен како судски доставувач, судот на 22.04.2026 година му определи мерка куќен притвор во траење од 30 дена. Иако обвинителството бараше притвор, судот одлучи поинаку.
„Против ова решение, јавниот обвинител има поднесено жалба до кривичниот совет на овој суд“, соопштија од судот.
И покрај фактот што станува збор за вработени во истата институција, од Основниот кривичен суд Скопје појаснуваат дека постапувале по предметите бидејќи делото спаѓа во надлежност на одделението за организиран криминал и корупција, а судската пракса не дозволува изземање на судот во вакви случаи.