Азиските берзи забележаа нагол раст на почетокот на денешното тргување, како реакција на новите сигнали за можен мировен договор на Блискиот Исток.
Истовремено, позитивните најави придонесоа цените на нафтата на светските пазари да паднат на најниско ниво во изминатите два месеци.
Според податоците што ги објави Ројтерс, цената на американската сурова нафта падна за 1,2 проценти и изнесува 86,69 долари за барел, по вчерашниот пад од 2,6 проценти.
Пад од 1,1 процент е регистриран и кај суровата нафта „брент“, чија цена сега изнесува 89,40 долари за барел, откако во претходната сесија изгуби речиси три проценти од вредноста.
Најширокиот индекс на акции од Азиско-пацифичкиот регион на MSCI, надвор од Јапонија, оствари раст од 3,2 проценти.
Гледано по земји, јужнокорејскиот индекс KOSPI скокна за дури 7,4 проценти, јапонскиот Nikkei за 2,7 проценти, кинескиот CSI300 за еден процент, додека хонгконшкиот Hang Seng порасна за 1,3 проценти.
Овој бран на оптимизам претходно го зафати и Волстрит, каде што сите три главни индекси ги постигнаа своите најголеми дневни добивки уште од април.