Цените на нафтата забележаа пад на светските берзи откако американскиот претседател Доналд Трамп најави дека засега нема да има нова воена акција против Иран. Оваа изјава веднаш придонесе за видливо намалување на тензиите на енергетските пазари.
Пораките за продолжување на дипломатските разговори меѓу Вашингтон и Техеран беа позитивно пречекани од страна на инвеститорите. Како резултат на тоа, барелот сурова нафта од типот „Брент“ се спушти од околу 112 на 109 долари.
Дополнителен оптимизам на берзите донесоа и информациите дека САД би можеле привремено да ги олеснат одредени ограничувања за извоз на иранска нафта додека траат преговорите. Аналитичарите потенцираат дека токму овој потег помогнал значително да се намали притисокот врз цените.
Американскиот претседател потврди дека дипломатските напори продолжуваат, но испрати и јасно предупредување до Техеран.
„Разговорите со Иран продолжуваат и повеќе блискоисточни лидери побараа да се избегне нов конфликт во регионот. Сепак, американската армија останува подготвена доколку дипломатските напори не дадат резултат“, изјави Трамп.