Македонскиот актер Драган Спасов Дац преку социјалните мрежи се збогуваше со оперскиот пејач Ристе Велков, кој трагично загина во сообраќајната несреќа на скопската обиколница.
Дац во својата објава евоцираше спомени од почетоците на кариерата на Велков, кога му помагал околу поставувањето на неговите први улоги на сцената.
Тој се потсети на специфичен детаљ од нивната заедничка соработка и професионална поддршка во театарот пред многу години.
„Ристе, пред многу години, на твоите почетоци, ме замоли да ти помогнам околу еден мизансцен што требаше да го поставиш на сцената. Тогаш ти предложив еден фенер-симбол што многу ќе ти помогне во намерата на улогата. На премиерата блескаше, а јас ти подарив ист таков фенер, во минијатурна верзија…“, напиша Дац.
Познатиот актер со голема тага се осврна на незамисливата трагедија во која покрај оперскиот баритон, животот го загуби и неговиот син.
„Сега, осветли им го патот таму горе на син ти и на сите тие млади души. Премногу тажно…“, се наведува на крајот од емотивната порака на Драган Спасов Дац.