Општина Центар објави јавен повик за финансиска поддршка за поправка, санација и реконструкција на постојни покриви, како и за поправка и санација на лифтови во станбени згради на нејзина територија.
Со мерката е предвидено Општината да покрие 30 проценти од вкупната вредност на инвестицијата, но најмногу до 150.000 денари за покриви и до 300.000 денари за лифтови, додека преостанатите 70 проценти ги обезбедуваат сопствениците.
Право на учество имаат заедници на сопственици или управители на станбени згради во Општина Центар кои се постари од 15 години и имаат најмалку 70 проценти населени станови. За аплицирање потребна е одлука потпишана од 50 проценти плус еден сопственик, како и целосна документација предвидена со повикот.
Пријавите може да се доставуваат до 30 јуни 2026 година, односно до исцрпување на средствата, во Архивата на Општина Центар или по пошта.
Градоначалникот Горан Герасимовски порача дека целта е да се обезбедат поголема сигурност, подобра функционалност и поквалитетни услови за живеење во колективните станбени објекти.